WTA. წლის შემაჯამებელი: ვინუსის რევანში

წლის შემაჯამებელ ტურნირზე დასრულდა ჯგუფური ეტაპი "თეთრ ქვეჯგუფში". აქ ორი ტურის შემდეგ ერთი ნახევარფინალისტი იყო ცნობილი - კაროლინა პლიშკოვამ ზედიზედ ორი მატჩი მოიგო და განაღდებული ჰქონდა საუკეთესო ოთხეულში ყოფნა. ამიტომაც, ჩეხმა ბოლო ტურში თავი აღარ მოიკლა და ელენა ოსტაპენკოსთან საათსა და რვა წუთში ორ სეტში წააგო - 3:6, 1:6.

თავის მხრივ, ოსტაპენკოსთვისაც ამ მატჩს სატურნირო მნიშვნელობა არ ჰქონდა, რადგან ლატვიელი ვერც ერთ შემთხვევაში ვერ გადიოდა ნახევარფინალში.

ნახევარფინალის მეორე საგზური უნდა გაეთამაშებინათ გარბინ მუგურუსას და ვინუს უილიამსს, რომლებსაც თითო მოგება და თითო წაგება ჰქონდათ.

მთლიანად მატჩის მსვლელობას თუ გადავხედავთ, საერთო ჯამში, შეხვედრა თანაბარ ბრძოლაში მიდიოდა ამერიკელის ოდნავი უპირატესობით. ვინუსმა 13 ბრეიკ-პოინტი გამოიმუშავა და ექვსჯერ აიღო მეტოქის მოწოდება. მუგურუსას ანალოგიური მაჩვენებლები იყო - 10 და 4.

პირველ სეტში პირველი ბრეიკი ესპანელმა შეასრულა, თუმცა მომდევნო გეიმში დაკარგა ეს უპირატესობა. თითქოს ყველაფერი ტაი-ბრეიკისკენ მიდიოდა, მაგრამ მე-12 გეიმში მესამე სეტბოლზე უილიამსმა მეორე ბრეიკის შესრულება და სეტის მოგება შეძლო - 7:5.

მეორე სეტში მეტოქეებს საერთოდ არ მისდიოდათ თამაში საკუთარ მოწოდებაზე: ათი გათამაშებული გეიმიდან შვიდში ბრეიკი დაფიქსირდა. მუგურუსა სამჯერ დაწინაურდა ბრეიკით, მაგრამ 4:3-ის შემდეგ, ვერც ერთი გეიმის აღება ვეღარ შეძლო და საათი და 43 წუთი ბრძოლის შემდეგ, 5:7, 4:6 დამარცხდა.

ვინუსმა რევანში აუღო ესპანელს წელს, უიმბლდონის ფინალში წაგებისთვის.

პლიშკოვა პირველი ადგილიდან გადავიდა ნახევარფინალში, უილიამსმა კი მეორე ადგილი დაიკავა. 38 წლის ამერიკელი მეხუთედ ითამაშებს წლის შემაჯამებელი ტურნირის ნახევარფინალში.

ყოველდღიური სპორტული გაზეთი "ლელო"
1155
მკითხველის კომენტარები / 0 /
მსგავსი ამბები
რუბრიკის სხვა სიახლეები
;