WTA. წლის შემაჯამებელი: კაროლინ ვოზნიაცკი დომინირებს

WTA-ის წლის შემაჯამებელ ტურნირზე მეორე ტურის მატჩები დასრულდა. "წითელ ჯგუფში" გაიმართა ორი შეხვედრა და გამოიკვეთა მთავარი ფავორიტი.

დანიელმა კაროლინ ვოზნიაცკიმ პირველ ტურში მხოლოდ ორი გეიმი დაუთმო უკრაინელ ელინა სვიტოლინას და, ამჯერად, უფრო სერიოზული მეტოქე ჰყავდა - მსოფლიოს პირველი ჩოგანი სიმონა ჰალეპი.

მიუხედავად ამისა, ვოზნიაცკიმ იგივე შედეგი გაიმეორა - რეიტინგის ლიდერი საათსა და 3 წუთში 6:0, 6:2 გაანადგურა. დანიელს რვა ბრეიკ-პოინტი ჰქონდა და ხუთჯერ აიღო რუმინელის მოწოდება, მეტოქეს კი მხოლოდ ერთი ბრეიკ-პოინტის შანსი მისცა, რომელიც ჰალეპმა ვერ გამოიყენა.

* * *

ვოზნიაცკის ჯერ არ აქვს გაფორმებული ნახევარფინალის საგზური, რადგან დღის მეორე მატჩში ფრანგმა კაროლინ გარსიამ თითქმის სამსაათიან ბრძოლაში დაამარცხა სვიტოლინა - 6:7(7), 6:3, 7:5.

შეხვედრა თანაბარ და გარდამავალ ბრძოლაში მიდიოდა. უკრაინელი ძალიან ახლოს იყო მოგებასთან - მესამე სეტში 5:3-ს იგებდა და მატჩზე აწვდიდა, მაგრამ მეტოქეს ზედიზედ ოთხი გეიმის აღებისა და მატჩის მოგების საშუალება მისცა. გარსიამ ამ მატჩში 16-დან 7 ბრეიკ-პოინტი გამოიყენა, მის მეტოქეს კი ხუთი ბრეიკი ჰქონდა 11 ბრეიკ-პოინტიდან.

ორი ტურის შემდეგ, ვოზნიაცკი ორი მოგებით ლიდერობს, თითო მოგება აქვთ ჰალეპსა და გარსიას, არც ერთი - სვიტოლინას. ბოლო ტურში, ვოზნიაცკი გარსიას შეხვდება, ჰალეპი - სვიტოლინას.

ყოველდღიური სპორტული გაზეთი "ლელო"
926
მკითხველის კომენტარები / 0 /
მსგავსი ამბები
რუბრიკის სხვა სიახლეები
;