WTA. წლის შემაჯამებელი: პლიშკოვა უკვე ნახევარფინალშია

სინგაპურში წლის შემაჯამებელ ტურნირზე მეორე ტური დაიწყო. გუშინ, საქმეში "თეთრი ჯგუფის" წევრები ვიხილეთ.

თავდაპირველად, კორტზე ის ჩოგბურთელები გავიდნენ, რომლებმაც პირველ ტურში წააგეს - ამერიკელი ვინუს უილიამსი და ლატვიელი ელენა ოსტაპენკო. თუ აქამდე, წლის შემაჯამებელზე ყველა შეხვედრა ორ სეტში დასრულდა, ამჯერად, მაყურებელმა ნამდვილი ბრძოლა იხილა, რომელშიც ამერიკელმა 3 საათსა და 13 წუთში 7:5, 6:7(3), 7:5 მოიგო.

ჩოგბურთელებმა კატასტროფულად ითამაშეს საკუთარ მოწოდებაზე - ჯამში დაფიქსირდა 44 (!) ბრეიკ-პოინტი და 20 (!) ბრეიკი. ვინუსმა 11-ჯერ მოიგო მეტოქის მოწოდება, ოსტაპენკომ - ცხრაჯერ.

აღსანიშნავია, რომ პირველ სეტში ლატვიელი სამჯერ იყო დაწინაურებული ბრეიკით და მაინც მოახერხა წაგება, მეორე სეტშიც ორჯერ ვერ შეინარჩუნა ამგვარი უპირატესობა, თუმცა, ტაი-ბრეიკზე მოიგო, მესამეში კი უკვე მუდმივად უილიამსი იყო წინ და სეტში მის მეოთხე ბრეიკს ლატვიელმა ვეღარ უპასუხა.

* * *

ამის შემდეგ, ჯგუფის ლიდერების - ესპანელი გარბინ მუგურუსასა და ჩეხი კაროლინა პლიშკოვას ჯერი დადგა. პირველ ტურში ორივემ ძალიან კარგი შთაბეჭდილება დატოვა და მაყურებელი მორიგ დაძაბულ მატჩს ელოდა, მაგრამ პლიშკოვა ერთი თავით მაღლა აღმოჩნდა მეტოქეზე და დაანახვა ყველას, რომ ტურნირის ერთ-ერთი მთავარი ფავორიტია.

ჩეხმა საათი და სამი წუთი იკმარა მუგურუსას გასანადგურებლად - 6:2, 6:2. პირველ სეტში პლიშკოვამ თავიდანვე შეასრულა ბრეიკი და შემდეგ, არა თუ შეინარჩუნა ეს უპირატესობა, არამედ, მეორედ აიღო მეტოქის მოწოდება.

მეორე სეტი მუგურუსამ შედარებით კარგად დაიწყო და პირველ გეიმში ორი ბრეიკ-პოინტის შანსი მიიღო, მაგრამ ვერ გამოიყენა. როგორც ჩანს, ამან ესპანელი ჩოგბურთელი გატეხა და მან ზედიზედ ხუთი გეიმი დათმო - 0:5. პლიშკოვა ოდნავ მოეშვა და მოწინააღმდეგეს ორი გეიმი დაუთმო, მაგრამ დროულად მოახერხა კონცენტრაცია და მატჩში მეხუთე ბრეიკით დაასრულა საქმე.

ორი ტურის შემდეგ, პლიშკოვას ორიდან ორი მოგება აქვს, თითო-თითო მოგებით მეორე-მესამე ადგილებზე არიან მუგურუსა და უილიამსი, არც ერთი მოგებით ბოლოზეა - ოსტაპენკო.

"თეთრ ჯგუფში" მესამე ტური ასეთია: უილიამსი-მუგურუსა, ოსტაპენკო-პლიშკოვა. ამ უკანასკნელს უკვე განაღდებული აქვს ნახევარფინალში თამაში, მეორე საგზურს კი უილიამსისა და მუგურუსას მატჩში მოგებული მიიღებს.

ყოველდღიური სპორტული გაზეთი "ლელო"

1141
მკითხველის კომენტარები / 0 /
მსგავსი ამბები
რუბრიკის სხვა სიახლეები