WTA. წლის შემაჯამებელი ტურნირი: ჯერ ნაკლები ბრძოლაა

ჯერჯერობით, წლის შემაჯამებელ ტურნირზე მაყურებელი მატჩებში ბრძოლას თითქმის ვერ ხედავს. ჩაიარა პირველმა ტურმა და ოთხივე ჩატარებული შეხვედრა ორ სეტში დასრულდა.

გუშინ, 23 ოქტომბერს, პირველი ტურის მატჩები გაიმართა "წითელ ჯგუფში". პირველები კორტზე სიმონა ჰალეპი და კაროლინ გარსია გავიდნენ. პირველ სეტში თანაბარი ბრძოლა წარიმართა. პარტიის შუაში მეტოქეებმა ბრეიკები გაცვალეს, გადამწყვეტი კი აღმოჩნდა მეცხრე გეიმი, რომელშიც ჰალეპმა მეორე ბრეიკი შეასრულა და შემდეგ სეტზეც ჩააწოდა.

მეორე სეტში რუმინელმა ბრწყინვალედ გამოიყენა ბოძებული შანსები - ორი ბრეიკ-პოინტი ჰქონდა და ორივე მოგებულ ქულაში გარდასახა. საათი და 27 წუთი ბრძოლის შემდეგ - 6:4, 6:2 და ჰალეპმა მოგებით დაიწყო სეზონის დასკვნითი ტურნირი.

საინტერესოა, რომ გარსიას ამ მატჩში მეტი ბრეიკ-პოინტი ჰქონდა, ვიდრე მის მეტოქეს - ექვსი ხუთის წინააღმდეგ, მაგრამ ფრანგმა მხოლოდ ერთი ბრეიკი გააკეთა, რუმინელმა - ოთხი.


* * *
დღის მეორე შეხვედრაში კი 59-წუთიანი გასეირნება გამოუვიდა დანიელ კაროლინ ვოზნიაცკის. უკრაინელმა ელინა სვიტოლინამ მხოლოდ პირველი სეტის სტარტზე გაუწია წინააღმდეგობა მეტოქეს, მაგრამ 2:2-დან მოყოლებული, ვოზნიაცკიმ ზედიზედ 10(!) გეიმი აიღო და 6:2, 6:0 მოიგო.

ბალტიისპირელმა ხუთიდან ხუთი ბრეიკ-პოინტი გამოიყენა, უკრაინელს კი ერთადერთი ასეთი შანსი ჰქონდა და ისიც უშედეგო.

ხვალ, წლის შემაჯამებელ ტურნირზე მეორე ტური იწყება "თეთრ ჯგუფში". ჯერ ითამაშებენ პირველ ტურში წაგებულები - ვინუს უილიამსი და ელენა ოსტაპენკო, შემდეგ კი ჯგუფის ლიდერები - გარბინ მუგურუსა და კაროლინა პლიშკოვა.

ყოველდღიური სპორტული გაზეთი "ლელო"

711
მკითხველის კომენტარები / 0 /
მსგავსი ამბები
რუბრიკის სხვა სიახლეები