ტარიელ ხეჩიკაშვილი 'საბურთალოსა' და ევრომიზნებზე: ამას თუ არ გავაკეთებ,  სხვაგვარად ფეხბურთში  ჩემს ყოფნას  აზრი დაეკარგება

ევროსეზონი მოგვიახლოვდა - ერთი თვეც და ქართული გუნდები ევროტურნირებში ჩაერთვებიან. ჩვენ შევეცდებით გავიგოთ, როგორ ხვდებიან ქართული კლუბები ახალ ევროსეზონს და გეგმავენ თუ არა გაძლიერებას. ამის შესახებ “ლელოსთან” პირველად საქართველოს ჩემპიონის, “საბურთალოს” პრეზიდენტმა ტარიელ ხეჩიკაშვილმა ილაპარაკა...

ევროთასების მოლოდინში

- შევძლებთ თუ არა ევროსარბიელზე ღირსეულად გამოსვლას? “საბურთალოს” საფირმო ნიშანი იყო და დღესაც არის პროფესიონალიზმი, პატიოსნება და ძლიერი თანამედროვე მენეჯმენტი. ეს კი გულისხმობს სტაბილურობასა და დინამიკას. ბოლო წლებში გუნდს ცალსახად პროგრესი აქვს და ჩვენი მიზანი ამ სტაბილური ზრდის შენარჩუნება, ეროვნულ ლიგაში ლიდერებად ჩამოყალიბება, ევროსარბიელზე ღირსეული გამოსვლა და ჯგუფში მოხვედრაა. აქამდე მიღწეული პროგრესი კლუბის მენეჯმენტის და სამწვრთნელო სტაფის მიერ შედგენილი გეგმების შედეგი იყო. იმედი მაქვს, ევროთასებზე გასვლა ამ წინსვლისთვის ახალი ეტაპი გახდება...

ევროსარბიელზე გამოსვლის უფლება ჩვენ მიერ შედგენილი 4-წლიანი განვითარების გეგმის შედეგად მოვიპოვეთ. ეს ითვალისწინებდა საქართველოში ყველა ტიტულის, მათ შორის, ჩემპიონობის მოპოვებას და ევროპის რომელიმე ტურნირის ჯგუფურ ეტაპზე მოხვედრას... 

ცხადია, ჩვენი მოთამაშეების უმრავლესობას ევროტურნირებში თამაშის გამოცდილება არ აქვს და მესმის, რომ გაგვიჭირდება. პლუს, საქმეს ის გაართულებს, რომ განთესილებში არ ვიქნებით და წილისყრა მაქსიმალურად ძლიერ მეტოქეს შეგვახვედრებს... თუმცა, მაქსიმუმს გავაკეთებთ, ღირსეულად რომ გამოვიდეთ...

გაძლიერება გვჭირდება

- ამ მიზნით გაძლიერებას ვგეგმავთ. არ მაქვს ილუზია, თითქოს, ჩემპიონობის მოპოვების შემდეგ საკადრო კუთხით სამუშაო ნაკლებად გვაქვს. მაგრამ ეს მთავარი მწვრთნელისა და სპორტული დირექტორის პრეროგატივაა. მწვრთნელის სურვილი იყო, საქართველოს ჩემპიონატის პირველი წრის შემდეგ გაგვეანალიზებინა, რომელ პოზიციაზე გვიჭირდა და მოთამაშეები ამის შემდეგ დაგვემატებინა.

ახლა მიახლოებითი სურათი უკვე გასაგებია და მოლაპარაკებები დაწყებულია. თავადაც ვხედავთ, რომ გაძლიერება გვჭირდება და რომ ახლანდელი გუნდით ჩემპიონთა ლიგის საკვალიფიკაციო ეტაპზე თამაში გაგვიჭირდება. აქედან გამომდინარე, შესაბამისი ნაბიჯებიც უნდა გადავდგათ.

ოთხწლიანი პროგრამა

- ამ 5-10 წლის წინ რომ მეთქვა, “საბურთალო” საქართველოს ჩემპიონი გახდებოდა-თქო, გულიანად გაიცინებდნენ. ჩვენ უნდა დავწეროთ “საბურთალოს” ახალი ისტორია და ყოველ გამოწვევას თავი ღირსეულად გავართვათ. 4-წლიანი განვითარების გეგმის შედეგად, “საბურთალოს” იმ გუნდად ვხედავ, რომელიც მაღალი დონის მოთამაშეებს ზრდის, მათთვის ერთგვარი ფანჯარაა ევროპაში, ხოლო ევროტურნირებზე - ქართული საკლუბო ფეხბურთის ფლაგმანი. სხვაგვარად ფეხბურთში ჩემს ყოფნას აზრი დაეკარგება. 

გაძლიერება კი მხოლოდ მოთამაშეების დამატებას არ ნიშნავს. ესაა მენეჯმენტის გაძლიერება, ინვესტიციის გაზრდა და ინფრასტრუქტურის გაუმჯობესება. მიხარია, რომ გუნდის გაძლიერებაში მარტო არ ვარ და თანამოაზრეები, ინვესტორები და სპონსორები გვყავს. მადლობა მათ თმენისა და თანადგომისთვის, მიხარია, ამ ადამიანების და ბიზნესჯგუფების რიცხვი ყოველწლიურად რომ იზრდება - “საბურთალო” ამ კუთხითაც ქართული ფეხბურთის ლიდერებშია. დარწმუნებული ვარ, ჩვენს წარმატებაში პარტნიორების კონტრიბუცია კიდევ უფრო გაიზრდება და თვალსაჩინო გახდება. 

ბიუჯეტი

- დღეისთვის “საბურთალო” საქართველოში ერთ-ერთი ყველაზე მაღალბიუჯეტიანი კლუბია და ამ კუთხით ერთ-ერთი გამორჩეულები ვართ. რა თქმა უნდა, ფული ბევრს ნიშნავს და მინიმალური ოდენობა მაინც უნდა გქონდეს, რომ რაღაც ზღვარს მიუახლოვდე.

მაგრამ აქვე ვიტყვი, რომ მხოლოდ ფული ცალსახად წარმატების გარანტი ვერ გახდება, თუ აზრიანად არ გამოიყენე. მთავარი აქაც სტაბილურობაა და იმას მივაღწიეთ, რომ კლუბში ყველამ იცის, როდის იღებს ხელფასს. ეს მნიშვნელოვანი დეტალია.

რაც შეეხება ბიუჯეტს, ის რამდენიმე მილიონია. დარწმუნებით შემიძლია გითხრათ, რომ ჩვენ სლოვაკეთის, ლატვიის, ლიტვის, მაკედონიის ბევრ გუნდზე უკეთესი ფინანსური შესაძლებლობები გვაქვს. 

სხვა საქმეა, რომ მათ ჩვენთან შედარებით სხვა სახის უპირატესობა აქვთ - ევროპაა და ფეხბურთელები იქაურ ათას დოლარს უფრო თანხმდებიან, ვიდრე ჩვენს - ორ და სამ ათასს. ესეც ჩვენი მოსაგვარებელი პრობლემაა. წლების განმავლობაში ქართულ ფეხბურთზე ბევრი ნეგატიური ინფორმაცია იყო და ვითარების შესაცვლელად დრო გვჭირდება. 

ახალგაზრდა მენეჯერი

- ახლახან, სპორტულ დირექტორად ლევან სეთურიძე მოვიწვიეთ - უდავოდ ნიჭიერი და საინტერესო ახალგაზრდა, ახალი თაობის მენეჯერი. ბევრს ნიშნავს, რომ ის “საბურთალოში” იზრდებოდა. დამტკიცებულია, რომ მსგავსი ადამიანებიდან იზრდებიან კლუბებისთვის სასარგებლო ფიგურები, რადგან თავიანთი კლუბის მიმართ სხვაგვარი, მზრუნველი დამოკიდებულება უყალიბდებათ.

ევროპელებთან ურთიერთობის დეფიციტი “საბურთალოს” არასოდეს ჰქონია, მაგრამ სეთურიძე ახალი პროექტებით მოვიდა. მანამდეც არაერთი საინტერესო ჩანაფიქრი განახორციელა და დარწმუნებული ვარ, მისი დანიშვნა კლუბს შედეგს მოუტანს. 

დაკონკრეტება არ მსურს, მაგრამ იმას კი გეტყვით, რომ სეთურიძის მონაწილეობით ერთ-ერთ პოპულარულ ევროპულ გრანდთან პარტნიორობაზე ხელშეკრულება მზადდება.

ეს ჩვენს მთავარ გუნდს შედეგს ტრანსფერების კუთხით მოუტანს, ხოლო “საბურთალოს” საფეხბურთო აკადემია საერთასორისო ტურნირებზე უფრო აქტიურად ითამაშებს. ეს იქნება შანსი ყველა ნიჭიერი მოთამაშისთვის, რომ გაიზარდოს და საბოლოოდ, ეროვნულ ნაკრებში მოხვდეს. 

საფეხბურთო პროგრამამ გაამართლა

- ფეხბურთის განვითარების ფონდს თავად ვხელმძღვანელობდი და ახლა უფრო თამამად ვიტყვი, რომ ეს გამართლებული ნაბიჯი იყო. “ლელოს” ფრაზა მახსოვს - “ვეფხისტყაოსნის” დაწერას შოთა რუსთაველმა უფრო ნაკლები დრო მოანდომა, ვიდრე საქართველომ ფეხბურთის განვითარების პროგრამის შედგენასო... 

მართლაც და, ამ პროგრამას საფეხბურთო სამყარო 25 წელიწადი ელოდა. მისი და ფეხბურთის განვითარების ფონდის ამოქმედებამ სპონსორების მოზიდვას შეუწყო ხელი - ეს შეუიარაღებელი თვალითაც აშკარად ჩანს. ჩვენს ფეხბურთში ყველაზე დიდი პრობლემა ნდობა იყო, რაც ფონდმა და ფეხბურთის ფედერაციამ დააბრუნეს.

ამის შედეგები ჩანს ინფრასტრუქტურულ გამიზნულ პროექტებში, თუნდაც საერთაშორისო აღიარების კუთხით... ბავშვთა ფეხბურთის განვითარებისთვისაც უმნიშვნელოვანესი პროექტების განხორციელება დაიწყო. ახლა სკოლების კატეგორიზაცია რეალურად მიმდინარეობს და მათ ფედერაცია ეხმარება - ესაა სწორედ ბავშვთა ფეხბურთის რეალური დახმარება, რაზეც წლების განმავლობაში ვლაპარაკობდით...

ჩვენი ადგილი მსოფლიო რუკაზე

- ერთ-ერთი მნიშვნელოვანი მოვლენა გუნდების გეოგრაფიული არეალის გაზრდაა. “ლელოს” წერილი მახსოვს - იყო დრო, როცა საქართველოს ქალაქების 2/3-ში საფეხბურთო გუნდები არ არსებობდა და მოთამაშეების რაოდენობა 11 ათსამდე იყო შემცირებული! ეს იყო სრული კატასტროფა. ახლა მასობრიობის გასაზრდელად რამდენიმე პროექტი ხორციელდება და თითქმის ყველა რეგიონსა და ქალაქში გუნდი ყალიბდება.

ამას გარდა, ძალიან მნიშვნელოვანი ნაბიჯი ეროვნული ლიგის გაშუქების ახალი პროექტი გახდა, რამაც მისი ცნობადობა გაზარდა და ახლა იქამდე მივედით, რომ მას 400 ათასზე მეტი მაყურებელი ჰყავს. ანუ ეს საქართველოში ერთ-ერთი ყველაზე ყურებადი პროექტია. 

მაგრამ მთავარი გამოწვევები წინაა. მთავარი მიზანია, ფეხბურთი ცალსახად საინტერესო ინდუსტრია გახდეს და მსოფლიოს რუკაზე საქართველომ თავისი ღირსეული ადგილი იპოვოს - სანაკრებო და საკლუბო დონეზე, ასევე, სატრანსფერო ბაზარზე. 

მაგრამ ეს მხოლოდ ფეხბურთის ფედერაციის გასაკეთებელი არ არის. ეს ტვირთი კლუბებმაც უნდა ვზიდოთ. ჩვენ გემოვნებიანი გულშემატკივარი გვყავს და მათი მოთხოვნები უნდა დავაკმაყოფილოთ. ეს თუ შევძელით, მსოფლიო რუკაზე ჩვენი ადგილის პოვნაც არ გაგვიჭირდება. 

ყოველდღიური სპორტული გაზეთი "ლელო"
2221
მკითხველის კომენტარები / 0 /
მსგავსი ამბები
რუბრიკის სხვა სიახლეები
;