"ლიონმა" ევროპალიგის საპასუხო მერვედფინალში 4:0 დაამარცხა FCSB-ის ("სტიაუა") და ახლა "მანჩესტერ იუნაიტედთან" დაიჭერს საქმეს. გიორგი მიქაუტაძემ ოთხივე გოლში მიიღო მონაწილეობა, რაც რბილად ნათქვამია.

მან მე-14 წუთზე გახსნა ანგარიში - რაიან შერკის გადაცემის შემდეგ საქართველოს ნაკრების ფორვარდი საჯარიმოში სამ მცველს გაექცა და ცაციათი დააგვირგვინა შეტევა...

პირველივე ტაიმში ჟორჟი საგოლე პასითაც გამოირჩა ეპიზოდში, როცა თავად შეეძლო კარში დარტყმა, მაგრამ ერნესტ ნუამაზე ამჯობინა გადაცემა - 2:0.

მერე კი იდეალური შანსი დაკარგა დუბლის შესასრულებლად - მეკარესთან პირისპირ გავიდა, მაგრამ დააყოვნა და აღარც საგოლე გადაცემა გამოუვიდა...

დაიწყო თუ არა მეორე ტაიმი, ჟორჟმა მაინც გაიფორმა დუბლი - შერკის კიდევ ერთი ზუსტი გადაცემა და ქართველი ფორვარდი აუღელვებლად ურტყამს ორ მცველს შორის - 3:0.

და კიდევ ერთი საგოლე პასი თამაშის ბოლოს და კვლავ ნუამაზე - მიქაუტაძე აქაც მშვენივრად გაიხსნა და ფეხზე დაასვა ბურთი თანაგუნდელს - 4:0.

12 გოლი და 6 საგოლე პასი - ასეთია საქართველოს ნაკრების ფორვარდის მონაგარი მიმდინარე საკლუბო სეზონში. შეფასებები: Flashscore - 8,5; Sofascore - 9,8; Whoscored - 9;5.