ბოსნია. WWIN ლიგა. სარაევო (გიორგი გულიაშვილი, ვასილიოს გორდეზიანი) - იგმანი 2:1. გორდეზიანის პენალტით და გიორგი გულიაშვილის ბრწყინვალე გოლით "სარაევომ" 2:1 მოუგო "იგმანს".

გორდეზიანი ამ ზამთარს გახდა გულიაშვილის თანაგუნდელი და უკვე ძირითად შემადგენლობაშიც ხვდება, მეტიც - პენალტის შესრულებასაც ანდობენ და გახსნა კიდეც ანგარიში 11-მეტრიანის ნიშნულიდან.

ეს მისი პირველი გოლია ახალ გუნდში და იმედია, კიდევ არაერთს გაიტანს. გულიაშვილს კი უკვე 14 გოლი დაუგროვდა და დამაჯერებლად ლიდერობს ბომბარდირთა დავას.

მართლაც ბრწყინვალე იყო მისი მოქმედება გოლის ეპიზოდში - კარგად გაიხსნა, მერე ცრუ მანევრით ორი მცველი ჩამოიცილა და ანგარიში 2:0 გახადა. შეცვალეს თამაშის ბოლოს, მეორე დამატებულ წუთზე, გორდეზიანმა კი 75 წუთი გაატარა მოედანზე.